“Disa ministra italianë janë gënjeshtarë kur nuk zbulojnë fondet evropiane që i janë dhënë Italisë”, është akuza e bërë nga presidenti i Komisionit të BE-së Jean-Claude Juncker, sipas asaj që raporton “Euranet plus”.

Ai ka treguar për përshtypjet e tij gjatë vizitës në Itali. “Kam qenë në Itali dy ditët e fundit – ka vijuar Juncker- dhe kam konstatuar se shumë italianë mendojnë se Evropa nuk bën aq sa duhet për të ndihmuar Italinë, që gjë më vjen keq”.

Presidenti i Komisionit Evropian ka dhënë një sërë të dhënash: “Duhet të dinë se që kur kam qenë unë, kemi dhënë 130 miliardë dollarë për Italinë: me planin Juncker 63.3 miliardë, fondet strukturore për të rigjallëruar ekonominë italiane. Në total, mbështetja evropiane për Italinë është 130 miliardë. A ka qoftë edhe një italian i vetëm që e di këtë? Jo, sepse një numër i caktuar i ministrave italianë thonë pikërisht të kundërtën, janë gënjeshtarë, gënjeshtarë”, ka raportuar radio “Euranet plus”.

Menjëherë pas kësaj ka reaguar Luigi Di Maio. “Unë nuk e kuptova se çfarë donte të thoshte Juncker, por nuk kam ndërmend të ushqej tensionet me Komisionin e BE-së, ky është një moment delikate për të gjithë Evropën”, ka deklaruar ai./tch/