Presidenti i Republikës së Kosovës, Hashim Thaçi, ka pranuar të premten letrat kredenciale të ambasadores Salma Frances Mancell, ambasadore jo-rezidente e Republikës së Ganës për Kosovë.

“Kam kënaqësinë të pranoj kredencialet tuaja dhe t’ju uroj për marrjen e detyrës së Ambasadores së Ganës për Kosovë”, është shprehur presidenti Thaçi, duke falënderuar për njohjen dhe mbështetjen e Ganës për Kosovën.

“Jemi shtet i ri, por me ambicie të mëdha për marrëdhënie të mira me të gjitha shtetet që punojnë për paqe e liri të popujve në botë”, ka thënë Thaçi.

Ai ka shprehur gatishmërinë për thellim të bashkëpunimit në mes dy vendeve mike.

Ndërsa ambasadorja Salma Frances Mancell është shprehur e lumtur që po merr detyrën e Ambasadores për Kosovë dhe që mund të kontribuojë në ndërtimin e marrëdhënieve bilaterale në mes dy vendeve tona.

“Gana ka qenë motiv për lirinë e popujve të Afrikës. Sot është shtet me potencial të madh për zhvillim ekonomik. Dëshirojmë të ndihmojmë njëri-tjetrin dhe të bashkëpunojmë”, ka thënë Mancell.

/Epoka e re/