Presidentja e Kosovës, Vjosa Osmani nuk ka marrë pjesë në “Paradën e Krenarisë”.

Këshilltari i presidentes Osmani, Bekim Kupina, ka thënë se shefja e shtetit është në takime.

“Në takime është”, ka thënë ai për “Express”, kur është pyetur se a është duke marrë pjesë presidentja në këtë paradë.

Në këtë aktivitet nuk është parë as kryeministri Albin Kurti.

“Express” ka provuar të kontaktojë edhe me zëdhënësin e qeverisë, Përparim Kryeziu, për mungesën e Kurtit në paradë, por i njëjti deri në momentin e publikimit të këtij  teksti nuk ka kthyer përgjigje.

Në ndërkohë nga zyrtarët shtetërorë në paradë është parë vetëm deputetja e Vetëvendosjes, Adriana Matoshi.

Ndërsa nga faktori ndërkombëtar në këtë paradë ka qenë i pranishëm ambasadori amerikan, Philip Kosnett.