Presidentja e Republikës së Kosovës, Vjosa Osman,  ka përkujtuar 24 vjetorin e masakrës së Abrisë.

Ajo ka thënë se do të vazhdojmë përpjekjet që ata të cilët e kanë kryer këtë akt mizor të dalin para drejtësisë.

“24 vjet më parë, 23 anëtarë të familjes Deliu, të moshave 2 deri në 94-vjeç u masakruan nga pushteti gjenocidal serb, teksa po e kërkonin shpëtimin maleve,  duke ikur nga barbaria e forcave të regjimit të Serbisë”, ka thënë presidentja Osmani.

Reagimi i plotë i Osmanit:

24 vjet më parë, 23 anëtarë të familjes Deliu, të moshave 2 deri në 94-vjeç u masakruan nga pushteti gjenocidal serb, teksa po e kërkonin shpëtimin maleve,  duke ikur nga barbaria e forcave të regjimit të Serbisë. Ata qenë shndërruar në shënjestër të mizorisë serbe, sepse ishin shqiptarë dhe sepse donin të jetonin të lirë në vendin e të parëve të tyre.

Sot, i kujtojmë me dhimbjen e njëjtë me atë të asaj dite dhe të secilës ditë të mëpastajme. Kjo dhimbje bëhet edhe më e madhe teksa kjo masakër, dëshmi e egërsisë së forcave serbe, vazhdon të mbetet e pandriçuar nga drejtësia. Planifikuesit dhe ekzekutorët janë të lirë, shteti që i sponsorizoi i pabindur për përmasën e krimeve të kryera e familja në pritje të drejtësisë.

Ne do t’i vazhdojmë përpjekjet që ata të cilët e kryen këtë akt mizor të dalin para drejtësisë. Këtë ua kemi borxh viktimave dhe familjeve të tyre!

Qoftë i përjetshëm kujtimi për martirët dhe dëshmorët e Abrisë!