![](https://www.epokaere.com/wp-content/uploads/2024/08/osmani-8.jpg)
Presidentja Osmani rithekson përkushtimin e Kosovës për anëtarësim në NATO
Presidentja e Republikës së Kosovës, Vjosa Osmani, ka pritur të martën në takim ndihmëssekretarin e përgjithshëm të NATO-s për çështje të jashtme dhe siguri, ambasadorin Boris Ruge.
Presidentja Osmani ka përsëritur mirënjohjen e Kosovës për kontributin e vazhdueshëm të NATO-s në Kosovë, ndërsa ka ritheksuar përkushtimin e Kosovës për anëtarësim në NATO. Presidentja Osmani ka potencuar se Kosova është e gatshme që t’i kontribuojë unitetit transatlantik në mbrojtje të vlerave të përbashkëta të paqes, demokracisë e lirisë.
Në takim është diskutuar edhe për çështjen e hapjes së urës së Ibrit, me ç’rast, Osmani ka përsëritur se hapja e urës si akt normalizimi e integrimi është në interes të të gjithë qytetarëve, pa dallim etnie.
Presidentja Osmani ka cekur rëndësinë e konsultimit dhe koordinimit në mes të institucioneve tona dhe partnerëve tanë të sigurisë, veçanërisht me NATO-n, në mënyrë që të ndërtohet plani i përbashkët i zbatimit për hapjen e urës.
Më tutje, presidentja Osmani e ka uruar Rugen për samitin e suksesshëm të NATO-s në Uashington D.C., ku Republika e Kosovës është përfshirë për herë të parë në një sërë aktivitetesh në kuadër të samitit, me ftesë të presidentit Biden dhe Sekretarit Blinken, e ku është riafirmuar uniteti transatlantik dhe mbështetja e përbashkët për Ukrainën.