Sot në përvjetorin e heroit të kombit, Ismet Rrahmani, presidentja Vjosa Osmani ka vizituar familjen e tij në Açarevë të Skenderajt.

Osmani përmes një postimi në llogarinë e vet në “Facebook” ka shkruar se gjatë kësaj vizite ka kujtuar bashkë me familjen dhe miqtë e tij veprën heroike të Ismet Rrahmani për atdheun dhe kombin.

“Ismeti e shndërroi misionin për arsimimin e brezave në mision për liri. Si mësues ai edukoi shumë breza, por u transformua në luftëtar të lirisë, duke u bërë model i kombinimit të dijes dhe guximit. Këtyre idealeve ua kushtoi tërë jetën, deri në ditën që e përmbylli angazhimin e tij jetësor në shërbim të vendit, duke rënë në altarin e lirisë”, ka shkruar Osmani.