Nënkryetari i komunës së Prishtinës, Muhedin Nushi, dhe Blerta Thaçi, drejtoreshë e Open Data Kosovo, prezantuan edhe një bashkëpunim të suksesshëm. Platforma “Kontratat e hapura” është lansuar në bashkëpunim me Open Data Kosovo për të rritur transparencën në prokurim publik dhe për të mundësuar qasje të lehtë për të gjithë.

Në ndërkohë, kjo platformë është plotësuar me publikimin e të gjitha vendimeve të komunës ndaj kërkesave për rishqyrtim, vendimet e OSHP-së, si dhe publikimin e të gjitha dosjeve të tenderit, duke siguruar konkurrencë të drejtë në mes të operatorëve ekonomikë.

Implementimi i Standardit të dhënave për kontraktim të hapur (OCDS – Open Contracting Data Standard) është një hap më afër transparencës së skajshme në prokurim publik, dhe Komuna e Prishtinës është institucioni i parë në vend dhe rajon që e implementon këtë standard.

OCDS-ja mundëson qasjen në të dhëna dhe dokumente gjatë të gjitha fazave të procesit kontraktues dhe shfrytëzohet e i mbështet institucionet publike për të rritur transparencën e kontraktimit duke mundësuar analiza më të thella të të dhënave kontraktuese nga të gjitha grupet e interesit.

OCDS-ja është produkt i partneritetit të hapur kontraktues (OCP – Open Contracting Partnership) dhe përbëhet prej pesë fazave: planifikimi, tenderi (procedura e hapjes), fituesi, kontrata dhe implementimi.

Me platformën “Kontratat e hapura” dhe standardizimin e të dhënave Komuna e Prishtinës këtë vit aplikon për çmimin ICT “Shërbimi Publik i vitit 2018” në ICT AWRDS.

/Epoka e re/