Prishtina e Re e ka siguruar biletën për ndeshjen e barazhit kundër Feronikelit 74, e cila do të zhvillohet më 1 qershor në Klinë. Kjo ndeshje vendimtare do të përcaktojë se cila nga këto dy skuadra do të luajë në edicionin e ardhshëm në AlbiMall Superligë.

Në një ndeshje dramatike të barazhit të Ligës së Parë, e cila u zhvillua në stadiumin “Rexhep Rexhepi” në Drenas, Prishtina e Re triumfoi ndaj Dinamos së Ferizajt, pas një serie të gjatë penalltish. Rezultati përfundimtar i penalltive ishte 7:6 në favor të Prishtinës së Re, pas një ndeshje që përfundoi 2:2 në kohën e rregullt dhe 3:3 pas vazhdimeve.

Portieri Egzon Bislimi ishte heroi i vërtetë i Prishtinës së Re në këtë ndeshje, duke pritur disa penallti të lojtarëve të Dinamos. Performanca e tij e shkëlqyer e udhëhoqi skuadrën drejt kësaj fitoreje të rëndësishme. Në minutën e 22-të, Fidan Gërbeshi shënoi për Dinamon nga penalltia, por Salih Kosumi i barazoi shifrat shtatë minuta më vonë. Dinamo kaloi sërish në epërsi me golin e Daniel Tettes në minutën e tretë të shtesës së pjesës së parë.

Megjithatë, Prishtina e Re barazoi shpejt pas fillimit të pjesës së dytë me një gol të Vigan Ademit (47’). Në vazhdimet prej dy herë nga 15 minuta, prishtinasit kaluan në epërsi me golin e Urim Statovcit në minutën e 104-t, por Dinamo barazoi shpejt me golin e Dardan Jasharit vetëm dy minuta më vonë.

Me këtë fitore, Prishtina e Re është vetëm një hap larg hyrjes në Superligën e Kosovës dhe do të përballet me Feronikelin 74 në një ndeshje që pritet të jetë shumë interesante dhe emocionuese, e ku të dy skuadrat do të japin maksimumin për të siguruar vendin e tyre në elitën e futbollit kosovar për sezonin e ardhshëm.