Sali Bashota

Natë e fundit e dhimbjes

Kush do ta ngulë mbi kokë gurvarrin

Seancë e gjumëharresës së neveritur

A u thahen poetëve fytyra a u ndryshken fjalët

Duke i copëtuar vargjet e lira nga mallkimi

Korba korba korba fluturojnë mbi Kosovë

Asfalti i mbulur me gjak gjurmët e ferrit ndrijnë

E nesërmja e plagosur si thikë vizëllon

Prishtina mbyllet në burg si ta shpëtojmë kokën

A jeni gjallë miqtë e mi po vjen treni i vdekjes

Gjaku rrjedh do të krimbemi morrat do të na hanë

Ku do t’i varrosim thinjat e flokëve

Thonjtë e gishtave vajin e fëmijëve

Pëshpëritjet e fundit se na plasi zemra

Refugjatë të nëmur që barrën e lirisë e bartin në shpinë

Duke pritur arkivolin pa shqipshkrim

Të lagur në shiun e përgjakur të marsit

(1999)