Sot ka filluar Konferenca e XII-të e Evropës Juglindore për Fibrozë Cistike, e organizuar për herë të parë në Kosovë nga Ministria e Shëndetësisë, në bashkëpunim me Shoqatën Evropiane për Fibrozë Cistike dhe Shoqatën “Grupi mbështetës për Fibrozë Cistike në Kosovë”.

Në ceremoninë e hapjes, e cila pasoi pas konferencës për media, morën pjesë ministri i Shëndetësisë, Arben Vitia, Sekretari i Përgjithshëm i Ministrisë së Shëndetësisë, Dr. Naim Bardiqi, udhëheqësja e CF Europe, Hilde De Keyser, anëtari i Bordit të ECFS, Pavel Drevinek, kryetari i Shoqatës “Grupi mbështetës për Fibrozë Cistike në Kosovë”, Atdhe Rama, si dhe pediatër, Dr. Vlora Nimani.

Po ashtu, në konferencë morën pjesë mjekë, studiues, profesionistë shëndetësorë, përfaqësues të shoqatave, prindër dhe individë të prekur nga fibrozë cistike nga e gjithë Kosova.

Në fjalën e tij hyrëse, ministri Vitia theksoi rëndësinë e këtij takimi për avancimin e njohurive shkencore dhe përmirësimin e kushteve të trajtimit të pacientëve me fibrozë cistike.

Ai theksoi se kjo ngjarje është një mundësi e shkëlqyer për të bashkuar ekspertët më të shquar, mjekët dhe organizatat që punojnë për përmirësimin e jetës së personave me fibrozë cistike dhe për shkëmbimin e informacioneve të reja shkencore dhe praktika të mira.

“Ky ngjarje ofron një mundësi të shkëlqyer për të bashkuar ekspertët më të shquar, mjekët, kërkuesit dhe organizatat që punojnë çdo ditë për të përmirësuar jetën e personave me fibrozë cistike për shkëmbyer informacione të reja shkencore, praktika të mira dhe zhvillime të rëndësishme në fushën e trajtimit të kësaj sëmundjeje”, tha ministri Vitia.

Ai përfundoi duke shtuar se është i rëndësishëm sensibilizimi i opinionit publik lidhur me rëndësinë e diagnostikimit të hershëm dhe trajtimit të duhur të fibrozës cistike, një sëmundje gjenetike që ndikon në shumë aspekte të jetës së pacientëve dhe që kërkon vëmendje të vazhdueshme, bashkëpunim dhe mbështetje të fortë nga sistemi shëndetësor dhe shoqëria.

Ndërsa, Sekretari i Përgjithshëm, Dr. Naim Bardiqi gjatë konferencës për media, theksoi se sëmundja e fibrozës cistike kërkon angazhim të vazhdueshëm, mbështetje dhe kërkime të pandërprera për të vazhduar trajtime sa më efikase për një jetëgjatësi më të madhe dhe një cilësi më të lartë jetese për personat e prekur me fibrozë cistike.

“Ministria e Shëndetësisë mbështet pacientët me fibrozë cistike, duke siguruar trajtimet e nevojshme përmes ofrimit të produkteve farmaceutike: Pankreatin enzim 300mg dhe 150mg Dornase Alfa dhe vitamina ADEK (në dy forma sol dhe tableta), si dhe terapi komplimentare tjetër sipas nevojës. Vlera e terapisë që sigurohet është rreth 2 milionë euro në vit. Po ashtu, Fibroza Cistike është përfshirë në programin e Skriningut Neonatal, të cilin e fillojmë këtë vit, dhe me këtë program mundësohet identifikimi i hershëm të sëmundjeve përfshirë edhe identifikimin e hershëm të Fibrozës Cistike dhe sigurisht edhe fillimin e trajtimit me kohë”, tha dr. Bardiqi.

Udhëheqësja e CF Europe, Hilde De Keyser, u shpreh e kënaqur që Konferenca për Fibrozë Cistike e Evropës Juglindore në këtë vit u organizuar në Prishtinë.

Po ashtu, shtoi se në ditët në vijim, organizatat e pacientëve, profesionistët e fibrozës cistike dhe palët e tjera të interesuara do të ndajnë ekspertizën e tyre, si dhe do të ndërtojnë rrjete më të forta dhe do të diskutojnë se si mund të kapërcejmë sfidat me të cilat përballen njerëzit me fibrozë cistike.

Ndërkohë, përgjegjësi për programet e binjakëzimit në ECFS, Pavel Drevinek theksoi se Prishtina u zgjodh qëllimisht, pasi është një qendër aktive në programin ndërkombëtar të binjakëzimit me Holandën, ashtu si Shkupi dhe Tirana.

Sipas tij, qëllimi i projektit të binjakëzimit është që asnjë pacient dhe asnjë profesionist shëndetësor të mos mbetet pas.

Konferenca e XII-të e Evropës Juglindore për Fibrozë Cistike për tri ditë radhazi do të ofrojë mundësi për të diskutuar zhvillimet më të fundit në fushën e trajtimit dhe mbështetjes së pacientëve, si dhe për të përforcuar bashkëpunimin ndërkombëtar për përmirësimin e kujdesit ndaj personave që vuajnë nga fibrozë cistike.