Qeveria duhet të ndërmarrë masa të menjëhershme për t’i trajtuar vështirësitë ekonomike me të cilat po përballet sektori privat në përgjithësi dhe prodhuesit në veçanti që ta zbusë sadopak krizën që po rezulton nga pandemia globale COVID 19 u kërkua gjatë një forumi virtual me transmetim të drejtpërdrejtë të organizuar nga Oda Ekonomike Amerikane në Kosovë.

Kujtim Gjevori, themelues i kompanisë “Scampa”, njëherësh kryesues i komitetit të prodhimit në Odën Amerikane, theksoi se, me gjithë sfidat e vazhdueshme të prodhuesve në Kosovë, rezultatet e krizës globale mund të jenë fatale për këtë industri nëse e njëjta nuk stimulohet. Sipas tij, efekti i pandemisë ka qenë i menjëhershëm për sektorin e prodhimit, ndërsa vazhdimi i rritjes së kostove qoftë operacionale apo të sigurimit të lëndës bazë, eventualisht do t’ua pamundësojë mbijetesën shumë bizneseve prodhuese. Gjevori shprehu shqetësimin e tij mbi mungesën e incentivave nga shteti dhe u bëri thirrje institucioneve të bashkëpunojnë ngushtë me aktorë relevantë për t’i përkrahur bizneset para se dëmet e kësaj krize të jenë të pariparueshme për ekonominë e vendit.

Gojart Kelmendi, themeluesi i kompanisë “Eurokosova”, potencoi se vështirësitë në sigurimin e lëndës së parë si dhe rritja e kostos së kësaj lënde janë ndër çështjet më shqetësuese për industrinë e prodhimit. Ai konsideroi se sigurimi i qarkullimit të parasë është krucial në funksionimin më të rregullt të zinxhirit të furnizimit, gjersa kërkoi nga qeveria që t’i rialokojë mjetet financiare për nevoja emergjente në përkrahje të sektorit privat. Për më tepër, Kelmendi shtoi se askush nga qeveria nuk i ka kontaktuar deri më tani për ta vlerësuar ndikimin që pandemia ka pasur në sektorin e prodhimit, ose për të ofruar mbështetje të çfarëdoshme, ndërsa theksoi nevojën që qeveria të paktën të jetë azhure në pagesa me kontraktorë. Ai u bëri thirrje qytetarëve që të fokusohen në blerje të produkteve vendore, në mënyrë që qarkullimi i parave të mbetet brenda Kosovës.

Gjatë kësaj tryeze u diskutua edhe për domosdoshmërinë e prioritizimit të produkteve vendore në proceset e tenderimit, në mënyrë që prodhuesit vendorë të ndihmohen dhe dëmet ekonomike në vend të zvogëlohen.