Profesori universitar, Avdi Smajljaj, ka bërë thirrje për protesta kundër punësimeve që po bëjnë zyrtarët e LV-së për familjarët e tyre në institucionet e shtetit.

Ai përmes një postimi në llogarinë e vet në “Facebook” ka shkruar se Edona Maloku ia ka avancuar vajzën ministres së Arsimit, Arbërie Nagavci, e kjo e fundit për këtë e shpërblen Malokun me postin e zëvendësministres së Arsimit.

“Në mungesë të votave të mjaftueshme për të ndalur këto çoroditje e tallje me qytetarët e institucionet, atëherë protestat do të jenë të pashmangshme për të mos pritur 4 vite për të ndëshkuar verzionin e ri të familjarizmit, nepotizmit, klientelizmit, e kapjes së re të shtetit e institucioneve”, ka shkruar profesor Smajljaj.

Postimi i plotë i tij:

Protesta kundër verzionit të ri të familjarizmit, nepotizmit, klientelizmit e kapjes së re të shtetit.

Zoja (tanimë zvMinistre e Arsimit) Edona Maloku ia avancon vajzën Zojës Ministre Nagavci, e Zoja Ministre për këtë e shpërblen Zojën Maloku me një dhuratë modeste, e bën Zojën Maloku zvMinistre të arsimit.

Është ministri që do të duhej të rregulloj arsimin që është kusht i domosdoshëm për zhvilimin e vendit.

Sikur të ishin ministre e zvministre për rregullimin e kushteve të jetës e mirëqenies së pulave, ndoshta do të mund të përbihej disi kjo tallje e tyre me arsimin e vendin e votuesit e 14 Shkurtit. Pulat mjaftohen me një mbuloj ku nuk i godet shiu në kokë, të tjerat i përballojnë lehtë.

Besoj shoqëria civile duhet parë këto veprime e shumë tjera të ngjashme që po e ngulfatin të tashmën e të ardhmën e vendit e shoqërisë sonë.

Në mungesë të votave të mjaftueshme për të ndalur këto çoroditje e tallje me qytetarët e institucionet, atëherë protestat do të jenë të pashmangshme për të mos pritur 4 vite për të ndëshkuar verzionin e ri të familjarizmit, nepotizmit, klientelizmit, e kapjes së re të shtetit e institucioneve.

Të paktën këto margaritare nuk ua kishim borxh fëmijëve tonë.