Shtetet e Bashkuara të Amerikës (ShBA) dhe Britania e Madhe shprehën kundërshtimin e tyre të qartë ndaj ndalimit të dinarit dhe i kërkuan Kosovës që të negociojë me Serbinë në kuadër të dialogut.

Nëse Kosova refuzon të respektojë, dhe ShBA-ja dhe Britania e Madhe duan të ruajnë autoritetin e tyre në Ballkan, do të duhet të mbështesin fjalët e tyre me një lloj sanksioni, ka deklaruar Timothy Less, profesor në Qendrën për Gjeopolitikë në Universitetin e Kembrixhit.

Less ka vënë në dukje se sanksionet mund të nënkuptojnë një sërë gjërash.

“Ata mund të sanksionojnë disa individë në Kosovë, duke përfshirë një zyrtar të lartë të qeverisë. Ata mund të ndalojnë fondet ndërkombëtare. Ata mund të përkeqësojnë marrëdhëniet e tyre diplomatike, të ngrijnë mbështetjen për njohjen e Kosovës dhe integrimin në institucionet ndërkombëtare. Brenda Kosovës, ata mund të përpiqen të ndryshojnë pushtetin”, ka thënë Less.

Ai ka komentuar kështu ngërçin në të cilin kanë rënë marrëdhëniet në mes të Prishtinës dhe Beogradit dhe faktin se kryeministri i Kosovës ka injoruar kërkesat e Perëndimit për të hequr dorë nga vendimi për heqjen e dinarit në Kosovë.

“Është gjithashtu domethënëse, edhe pse jo e habitshme, që Rusia dhe Kina kanë shprehur kundërshtim të fortë ndaj veprimeve të Kosovës që dëmtojnë Serbinë, aleatin e tyre kyç rajonal, sepse kjo do të thotë se të gjitha fuqitë e mëdha janë të bashkuara në nevojën që Kosova të tërhiqet. Mendoj se Kosova ndoshta do ta bëjë këtë, edhe pse asgjë nuk është e sigurt, sepse do të ishte shumë e dëmshme për qeverinë dhe Albin Kurtin, vetëm një vit nga zgjedhjet”, ka thënë profesori britanik.