Profesori i biologjisë në Harvard dhe sipërmarrësi Timothy Springer pa të ardhme premtuese në një firmë të re bioteknike një dekadë më parë dhe bëri një investim të hershëm.

Tani, kryesisht si rezultat i atij “basti” – një kompanie në Masaçusets e quajtur “Moderna” – ai është një miliarder, shkruan Forbes.

Kjo pasi që aksionet e “Moderna”-s, e cila ka një vaksinë për COVID-19 aktualisht në provat klinike njerëzore, u rritën më shumë se 12 % këtë javë.

Kjo rritje e ka shndërruar Springerin në një miliarder: Forbes vlerëson se ai tani vlen 1 miliard dollarë bazuar në kapitalin e tij prej 3.5 % të kapitalit në “Moderna” dhe aksionet në tri kompani më të vogla bioteknike.

“Filozofia ime është të investosh në atë që dini, dhe unë jam një shkencëtar me zemër. Më pëlqen të zbuloj gjëra”, ka thënë Springer, 72 vjeç, për “Forbes”.

“Shumë shkencëtarë fillojnë kompani, por pak janë të suksesshëm. Unë jam një investitor aktiv dhe gjithashtu një shkencëtar shumë i rreptë…”.

Të martën “Moderna” njoftoi se Administrata e Ushqimit dhe Barnave e ShBA-së gjurmoi me shpejtësi kandidatin e saj për vaksinat COVID-19, duke i dhënë një shtysë përpjekjes së firmës për ta zhvilluar vaksinën e parë për sëmundjen.

“Moderna” ishte kompania e parë që filloi provat njerëzore për vaksinën e saj, më 16 mars në Seattle, dhe aksionet e kompanisë janë trefishuar në vlerë qëkur OBSh shpalli COVID-19 një pandemi në 11 mars.

I pandikuar nga pasuria e tij e re, Springer ende udhëton me biçikletë për të punuar çdo ditë në Kembrixh, Masaçusets, ku ai bën kërkime në laboratorin e tij.

Luksi i tij i vetëm, thotë Springer, është shtëpia e tij: “Më pëlqen kopshtaria dhe mbledh gurët… nuk kam nevojë për para. Kam një mënyrë jetese akademike”.

Ai gjithashtu është duke përdorur pasurinë e tij për t’i dhënë përsëri komunitetit shkencor: Në vitin 2017 ai dhuroi 10 milionë dollarë për ta themeluar Institutin për Inovacionin e Proteinave, një institucion jofitimprurës, i pavarur dhe i përkushtuar për ta studiuar shkencën e proteinave dhe duke ndihmuar sipërmarrësit bioteknikë t’i realizojnë idetë e tyre.