Komisioni për Administratë Publike, Pushtet Lokal, Media dhe Zhvillim Rajonal ka shqyrtuar Projektligjin për Komisionin e Pavarur për Media (KPM).

Raporti i përbërë me 93 amendamente është votuar me gjashtë vota pro, asnjë kundër dhe asnjë abstenim që të kalojë në seancë plenare për një lexim të dytë.

Ndërsa njëri nga anëtarët e këtij komisioni, deputeti Mergim Lushtaku, ka ngritur si rekomandim, dërgimin në lexim edhe të Komisionit të Venecias.

“Të dërgojmë dhe Komisionin e Venecias, një projektligj i rëndësisë së veçantë, që ka të bëjë me median e lirë”, ka thënë Lushtaku.

Edhe anëtari tjetër, deputeti Agim Veliu  ka përkrahur rekomandimin e tij që Komisioni i Venecias të shkoj për diskutim.

Ndërsa kryetari i këtij komisioni, Valon Ramadani, ka thënë se në këtë mbledhje nuk ka kohë për shqyrtimin e këtij projektligji në Komisionin e Venecias.

“Jam i bindur se do të kalojë si ligj dhe është në rregull, por ne nuk kemi kohë të shkojmë me Komisionin e Venecias”, ka thënë Ramadani.