Me ftesë dhe iniciativë të kryeprokurores së Prokurorisë Themelore në Pejë, Lumturije Vuçetaj, është mbajtur takim me drejtorët e drejtorive të arsimit në regjionin e Pejës dhe përfaqësues të tjerë, ku ishin prezentë drejtorët e drejtorive të arsimit nga komuna e Pejës, Deçanit, Istogut, Junikut, përfaqësuesi i Ministrisë së Arsimit, përfaqësues nga Policia e Kosovës, prokurorët koordinator të caktuar për rastet e veprave penale kundër drogës, integritetit seksual dhe dhunës në familje, ku u diskutua për një koordinim ndërinstitucional në mes të Prokurorisë dhe akterëve përgjegjës për mbarëvajtjen dhe sigurinë e një procesi arsimor, për një ambient të qetë shkollor.

Temë e diskutimit të këtij takimi ishte caktimi i shkollave për mbajtjen e ligjëratave në tri fusha dhe atë: dhuna në familje, pasojat e përdorimit të substancave narkotike dhe mbrojtja e integritetit seksual.

Gjatë këtij takimi u dhanë opinione të ndryshme, ku nga pjesëmarrësit u vlerësuar si iniciativë e qëlluar, edhe pse më parë ka qenë, por kjo është zbatuar vetëm në Komunën e Pejës por jo edhe në komunat tjera të regjionit, aty ku shtrihet edhe kompetenca lëndore dhe territoriale e Prokurorisë Themelore në Pejë, gjë që u mirëprit nga përfaqësuesit e Komunave tjera.

Si rezultat i takimit janë nxjerrë disa konkluzione që në takimet e radhës të jenë prezentë edhe kryetari i Këshillit të Prindërve; Caktimi i shkollave për mbajtjen e ligjëratave; Mbikëqyrja e kamerave të vendosura në shkolla nga personat kompetent dhe të autorizuar për mirëmbajtjen dhe funksionalizimin e tyre; Mbikëqyrja e kopshteve shtetërore dhe atyre private nga Ministria e Arsimit dhe Inspektorët përkatës si dhe ligjëratë edhe për posedimin e mjeteve të ftohta të cilat hyn në kuadër të armëve.