Në Bibliotekën Kombëtare të Kosovës “Pjetër Bogdani” janë promovuar veprat “Gjurmë poetike” dhe “Këshilla për jetën” të autorit Islam Musliu.

Në promovimin e këtyre dy veprave morën pjesë familjarë të autorit, miq, shkrimtarë, poetë, deputetë, profesorë, ministra, zëvendësministra, kryetarë të komunave, gjyqtarë, avokatë, teologë, drejtorë të shkollave, gazetarë, eprorë policorë, përfaqësues të FSK-së, këngëtarë e artistë të ndryshëm, shkruan “Epoka e re”.

Të dy veprat e Musliut u vlerësuan lartë dhe të dobishme për lexuesin.

Autori i këtyre dy veprave, Islam Musliu, ka falënderuar të gjithë të pranishmit që morën pjesë në promovimin e veprave të tij.

“Të cilët me praninë e tyre i dhanë vlerë të madhe këtij promovimi dhe e vlerësuan lart punën time. Isha tepër i emocionuar me praninë e madhe të miqve dhe dashamirëve të librit që na nderuan kaq shumë sot. Jam tepër mirënjohës secilit veç e veç dhe ua kthefsha për të mirë. Zoti ju nderoftë”, ka shkruar në “Facebook” Musliu.