Lista Serbe është duke pretenduar se Forca të Sigurisë së Kosovës (FSK) “mund të jenë në veriun e Kosovës”.

Përmes një komunikate, Lista Serbe ka theksuar se katër kryetarët e komunave veriore me shumicë serbe nuk e kanë aprovuar asnjëherë hyrjen e FSK-së në këto komuna.

Kjo parti politike ka kërkuar reagimin e KFOR-it.

“Inkursioni i paligjshëm i pjesëtarëve të Forcave të Sigurisë së Kosovës në territorin e komunës së Zubin Potokut është shkelje e rëndë e marrëveshjes së vitit 2013, e garantuar nga NATO, e cila garanton se asnjë formacion i armatosur i Prishtinës nuk mund të pushtojë komunat serbe në veri pa miratimin e kryetarëve të këtyre komunave dhe komandantit të KFOR-it”.

“Në kohën kur Prishtina po përpiqet të militarizojë veriun dhe të pushtojë komunat në veri me goditje me armë, incidente të tilla janë të papranueshme dhe kërkojnë reagimin e të gjithë atyre që janë përgjegjës për një mjedis të sigurt dhe të sigurt për të gjithë qytetarët, e mbi të gjitha KFOR-it. EULEX-i dhe UNMIK-u”, është thënë në njoftimin e Listës Serbe, ka raportuar portali propagandistik në gjuhën serbe “Kosovo-Online”.

Kjo parti është futur në konspiracion duke thënë se “nëse Albin Kurtit i dështon plani për regjistrimin e targava nga ana e serbëve, atëherë do të tentojë t’i frikësojë qytetarët serbë”.

“Edhe një herë ju bëjmë thirrje autoriteteve që të veprojnë në mënyrë parandaluese dhe të paralajmërojnë Kurtin se nuk do të tolerohet kjo sjellje. Sjellja e papërgjegjshme në këto momente për të fituar pikë politike është karakteristikë e politikanëve dhe manipuluesve të paaftë që aktualisht janë në krye të institucioneve në Prishtinë”, është thënë në komunikatën e Listës Serbe.