Me sloganin “Jo në emrin tim”, në Prishtinë është protestuar sot kundër Gjykatës Speciale pas dënimit me 26 vjet burgim për krime lufte të ish-komandantit të UÇK, Salih Mustafa.

Protesta e së shtunës u organizua nga Partia Socialdemokrate (PSD).

Kryetari i Partisë Socialdemokrate (PSD), Dardan Molliqaj, ka thënë se krerët e UÇK-së po mbahen peng në Hagë.

Molliqaj ka thënë se duhet bashkuar për të mbrojtur luftën e UÇK-së, shkruan “Epoka e re”.

“UÇK-ja nuk mund të gjykohet. JO në emrin tim!”, ka thënë ai.

“Lufta për liri është shenja që ky është shteti jonë. Damkosja e kësaj lufte është sulm mbi Kosovën e pavarur. Edhe 23 vjet pas çlirimit, çlirimi po ka kosto”, tha ai.

Ai e ka quajtur absurd dënimin e Salih Mustafës.

“Shikoni aktgjykimin e kësaj gjykate ku thotë që duhet të dënohet komandant Cali është nëse viktima është vrarë nga plumbat e ushtrisë serbe. Kjo është e pritshme kur gjykata nuk e ka qëllim drejtësinë, por e ka qëllim dënimin e UÇK-së. Procesi i Speciales na ka nxjerrë edhe një mësim, liria mund të fitohet një herë, por duhet të mbrohet çdo ditë”, ka thënë Molliqaj.

Protestuesit në pankarta mbanin emrat e të paraburgosurve në Hagë dhe të UÇK-së.

Pjesë e protestës ishin edhe OVLUÇK-ja dhe deputetë të opozitës.

Pjesë e kësaj proteste ishte edhe publicisti Muhamet Mavraj.

Ushtruesi i detyrës së kryetarit të OVLUÇK-së, Faton Klinaku, ka thënë Gjykata Speciale po gjykon vetëm shqiptarët, por jo krimet që i ka shkaktuar pushtuesi serb.

“Ajo po gjykon luftën tonë çlirimtare. Po e gjykon UÇK-në, duke e quajtur edhe si organizatë e përbashkët kriminale.  Ata gjenden në Hagë sepse po gjykohet lufta jonë. Organizatat e veteranëve kanë qenë kundër themelimit të Gjykatës Speciale”, ka thënë Klinaku.