Aleatët e udhëheqëses më me ndikim të opozitës në Venezuelë, Maria Corina Machado, thonë se ajo është “rrëmbyer” nga rrugët e Karakasit nga zyrtarët e regjimit pasi doli papritmas nga vendi ku fshihet për të udhëhequr një protestë të madhe kundër presidentit autoritar, Nicolas Maduro.

Maduro do të betohet për mandatin e tij të tretë presidencial të premten, pavarësisht dyshimeve të përhapura se ai vodhi zgjedhjet e vitit të kaluar. Trashëgimtari i Hugo Chavez-it nuk ka paraqitur asnjë provë për pretendimin e tij për fitore, ndërkohë që lëvizja e Machado-s ka publikuar votime të detajuara që ofrojnë prova bindëse se kandidati i saj, Edmundo Gonzalez, fitoi në të vërtetë.

Të enjten, mijëra mbështetës të opozitës dolën në rrugët e qyteteve në të gjithë Venezuelën për të protestuar kundër betimit të planifikuar të Maduros, me urdhër të Machados, e cili u fsheh menjëherë pas votimit të 28 korrikut 2024 për të shmangur kapjen.

Pas më shumë se 133 ditësh të izoluar në një vend sekret, Machado, u rishfaq të enjten pasdite në krye të një turme të madhe protestuesish në Karakas. Duke u ngjitur në një kamion, politikania i udhëhoqi ata me thirrjet: “Ne nuk kemi frikë”.

Pasi mbajti një fjalim plot pasion, Machado u largua nga tubimi, por u “përgjua dhe u ndoq”, thanë përfaqësuesit e saj në një deklaratë të shkurtër.

“Zyrtarët e regjimit hapën zjarr mbi motoçikletat që po e transportonin atë,” shtuan përfaqësuesit e Machado.

Carla Angola, një gazetare e njohur venezueliane, shkroi në X: “Regjimi ka rrëmbyer María Corina”.

Një tjetër gazetare e lartë venezueliane, Luz Mely Reyes, tha se para se të merrej, Machado i kishte thënë ekipit të saj “të mos negociojë lirinë e saj”.

Duke folur me gazetarët të mërkurën, në një nga intervistat e saj më të fundit kryesore, Machado tha se Venezuela po i afrohej “një prej momenteve më të rëndësishme në historinë e Amerikës Latine”.

“E vetmja gjë që i ka mbetur regjimit është represioni – e vetmja gjë që i ka mbetur është futja e frikës tek venezuelianët dhe nëse venezuelianët mund ta kapërcejnë këtë frikë, represioni do të jetë i pakuptimtë”, shtoi ajo.