Partia Socialdemokrate (PSD) ka hapur degën e saj edhe në Komunën e Istogut.

Duke e vlerësuar të rëndësishme shtrirjen organizative në Istog, nënkryetari i PSD-së, Visar Ymeri, sekretarja e përgjithshme, Aida Dërguti dhe koordinatori i degës, Burim Fejza, kanë prezantuar platformën socialdemokrate para mbështetësve dhe simpatizuesve.

Në njoftim e PSD-së është thënë se programi social e zhvillimor i PSD-së është përgjigja e duhur dhe konkrete për shërbime cilësore publike, transparencë radikale të shpenzimeve të parasë publike, investime nëpër të gjitha lagjet e fshatrat dhe për politika publike në mbështetje të më të varfërve.

“Potenciali natyror i Istogut është mundësi për zhvillimin e turizmit dhe bujqësisë, me mbrojtje të mjedisit dhe me model alternativ për bujqit. Qeverisjet e vlerësuara ndërkombëtarisht në Prishtinë dhe në Kamenicë janë referencat më të besueshme për politikat e kapacitetet e PSD-së për ta modernizuar dhe transformuar pozitivisht qeverisjen lokale, në shërbim të të gjithë qytetarëve. Kjo do të dëshmohet së shpejti edhe në Istog dhe në secilën komunë të Republikës”, është thënë në këtë njoftim e partisë që drejtohet nga Shpend Ahmeti.

/Epoka e re/