Adil Behramaj, ish-këshilltar i ish-presidentit Hashim Thaçi, ka reaguar ndaj vendimit të Ministrisë së Drejtësisë për të publikuar shpenzimet e avokatëve të ish-krerëve të UÇK-së në Hagë.

Ai ka bërë me dije se të dhënat e publikuar do të duhej të ishin informacione të klasifikuara për shkak të rëndësisë shtetërore.

Behramaj ka shkruar në “Facebook” se me kryeministrin Albin Kurti është ulur edhe niveli i klasifikimit të këtij dokumentacioni.

“Me sa nguti dhe ‘transparencë’ i publikon ministria e Albulena Haxhiut shpenzimet e avokatëve për ish-krerët e UÇK-së në Hagë, të cilat do të duhej të ishin informacione të klasifikuara për shkak të rëndësisë shtetërore. Që të mund t’i përdorin dhe përmendin kështu, këta edhe aktet nënligjore i kanë ndryshuar për t’i publikuar shpenzimet individuale dhe jo shpenzimet në total, siç kanë qenë më herët. Po ashtu, me vendim të kryeministrit Kurti është ulur edhe niveli i klasifikimit”, ka shkruar ai.

Ai ka kërkuar nga pushteti aktual që t’i publikon edhe shpenzimet e Prindon Sadriut, të cilat po i mbahen fshehur.

“Ndërsa, shpenzimet e Prindon Sadriut, bashkëshortit të presidentes Osmani, i mbajnë fshehur edhe pas vendimit të Agjencisë për Informim dhe Privatësi, e cila i gjobit dhe sërish nuk i bëjnë publike. Ata që janë në Hagë, familjet e tyre, familjet që sakrifikuan për këtë vend, do ta kalojnë edhe këtë sfidë. Por, shumë shpejt, disa do të mbesin përjetësisht të turpëruar!”, ka shkruar Behramaj.