Të martën janë publikuar rezultatet e regjistrimit të popullsisë në Preshevë, Bujanoc dhe Medvegjë.

Kryetari i Bujanocit, Nagip Arifi, ka bërë me dije se nga ky regjistrim del se Lugina e Preshevës ka rreth 100 mijë shqiptarë.
Në Preshevë dhe Bujanoc shumica e banorëve janë të kombësisë shqiptare, përderisa në Medvegjë ka më shumë serbë.

“Nga rezultatet preliminare që kemi siguruar mëngjesin e sotëm, Bujanoci numëron 54 mijë e 498 banorë dhe 13 mijë amvisëri, Presheva ka 59 mijë e 24 banorë dhe 11 mijë e 654 amvisëri, dhe Medvegja 8 mijë e 459 banorë dhe 5 mijë e 899 amvisëri. Këto shifra tregojnë se komuna e Bujanocit është komunë në rritje, ku në krahasim me regjistrimin e fundit të rregullt në vitin 2001, ku komuna jonë ka pasur gjithsej 43 mijë e 302, sot është rritur për më shumë se 11 mijë banorë. Për gjithë këtë sukses, fillimisht duhet të falënderoj shefin e misionit të OSBE-së në Serbi, Jan Braathu, i cili ishte garantuesi më i madh që ky proces do të zhvillohet në frymën e standardeve evropiane, i cili më pastaj më hapi rrugën që të marrë iniciativën për takime konsultative me përfaqësuesit e partive tjera politike shqiptare në Luginë për t’iu përgjigjur pozitivisht regjistrimit. Pas tri takimeve konsultative në kabinetin tim, më 25 korrik 2022, nënshkruam deklaratën e përbashkët për të marrë pjesë në regjistrimin e popullsisë”, ka deklaruar Arifi.

Ai ka thënë se ky numër i shqiptarëve në Luginë të Preshevës ka demantuar shifrat e regjistrimit të vitit 2011.

“Vendimi për të dalë në këtë regjistrim nuk ishte i lehtë, pas bojkotit të vitit 2011, por në fund doli të jetë i drejtë. I drejtë, sepse demantuam shifrat e regjistrimit 2011, ku shqiptarët llogariteshin rreth 5 mijë e 800 shqiptarë në gjithë Serbinë. Tanimë duket qartë se numri i shqiptarëve është rreth 100 mijë. Dhe, në fund, por jo më pak të rëndësishëm, falënderoj të gjithë qytetarët që u regjistruan, grupën punuese pranë administratës komunale, instruktorët që udhëhoqën këtë proces, si dhe një falënderim i posaçëm për të gjithë regjistruesit në terren, të cilët derë më derë trokitën përgjatë një muaji për të regjistruar çdo banorë dhe çdo shtëpi apo banesë”, ka theksuar Arifi.