Presidenti i Rusisë, Vladimir Putin e ka nominuar Dmitry Medvedevin edhe për një mandat si kryeministër i këtij vendi.

Siç ka njoftuar Kremlini, vendimi i presidentit është dërguar në Dhomën e Ulët të Parlamentit, pak kohë pasi Putini është inauguruar edhe për një mandat gjashtëvjeçar në postin e shefit të shtetit.

Duma shtetërore pritet që ta shqyrtojë nominimin më 8 maj.

Duket se vendimi i Putinit do të miratohet nga Duma shtetërore, e cila dominohet nga partia në pushtet, Rusia e Bashkuar.

Sipas Kushtetutës së Rusisë, Qeveria është e obliguar që të japë dorëheqje kur fillon mandati i ri i presidentit.

Në Rusi, kryeministri është numri dy në hierarkinë e shtetit dhe kryesisht ka përgjegjësi për çështjet ekonomike dhe i përgjigjet presidentit.