Grupi “BesaBesë”, përmes një njoftimi për media ka theksuar se e kanë parë me shqetësimin vendim e Qeverisë së Kosovës për heqjen e kufizimit për mallrat serbe në Merdarë.

Në reagimin për media ky grup thekson se vendimi i Qeverisë për heqjen e kufizimit për mallrat serbe në Merdarë ka qenë i ngutshëm dhe nuk i ka arritur objektivat sidomos, ato të cilat kanë të bëjnë me reciprocitetin.

“Serbia që 25 vite bënë barriera jo-tarifore në prodhimet kosovare deri tek kërcënimet e firmave të cilat tentojnë të importojnë prodhime kosovare në Serbi! Gjithashtu në produkte të cilat plasohen në tregun e Kosovës nuk shënohet ‘Republika e Kosovës’ po vetëm “Kosovo”. Serbia që 25 vite nuk e lejon transitin e produkteve me origjinë shtazore nga Kosova për në Evropë dhe anasjelltas. Prandaj, Qeveria e Kosovës nuk do të duhet të heq ndalesën para se të rregulloheshin këto barriera nga Serbia!”, thuhet në reagimin e tyre.

Ky grup tutje shton se “populli i Kosovës akoma i vuan plagët e marra nga regjimi serb. Në kohën kur qytetarët e Kosovës në mënyrë masive po e lëshojnë vendin, në kohën kur sektori privat gjendet në vështirësi qoftë financiare, ashtu dhe të gjetjes së punëtoreve, në kohën kur propaganda serbe s’ndalet ndaj shtetësisë së Kosovës, ne i bëjmë thirrje Qeverisë së Kosovës që ta ketë prioritet mirëqenien ekonomike dhe sociale të qytetarëve tanë”.

Grupi “BesaBesë” tutje iu bën thirrje qytetarëve të Kosovës dhe mbarë opinionit që të bojkotojnë produktet serbe.

“Askush më shumë se qytetarët e Kosovës brez pas brezi se kanë vuajtur nënshkrimin dhe torturën që u bë ndaj popullatës shqiptare, pasojat e asaj torture të regjimit të Milloshoviqit i kanë vuajtur gjenerata të tëra. Prandaj, s’ka vendim qeveritare as forcë politike më të madhe se vendimi qytetarë. Qytetarë të dashur, atdheu është i juaji, prandaj vendosni që t’i bojkotoni produktet serbe”, thuhet në komunikatën e grupit “Besa Besë”.