Qeveria e Kosovës ka miratuar vendimin për formimin e Komisionit për vendosjen e parimeve për themelimin e fondi sovran, premtim ky i kamotshëm i partisë në pushtet, Lëvizjes Vetëvendosje.

Kryeministri Albin Kurti,  formimin e komisionit e ka cilësuar si shumë të rëndësishëm për ndërmarrjen e hapave konkret për themelimin dhe funksionalizimin e fondit sovran.

“Në përputhje me zotimin tonë për themelimin e fondit sovran sot po e ndërmarrin një hap për realizimin e atij qëllimi. Pra me synim të menaxhimit të performancës financiare të aseteve strategjike e me qëllim të rritjes së vlerës, ngritjes së performancës dhe sigurimit të një shkalle të lartë të kthimit në investim. Ky komision me përbërjen e tij do të vendos parimet bazë të themelimit të fondit sovran dhe do të propozoj ndërmarrjen e hapave konkret për funksionalizimin e tij”, ka thënë Kurti në mbledhjen e qeverisë.