Nënkryetari i Lidhjes Demokratike të Kosovës, Lutfi Haziri, i ka kritikuar veprimet e kryeministrit të Kosovës, Albin Kurti.

Haziri tha se qeveria Kurti po i blen votat në mënyrë të moderuar, ndërsa foli për shtesat dhe “shpërndarjen lineare të buxhetit”.

Ai tha se qeveria ka shpërndarë “140 milionë euro në mënyrë lineare dhe miliona të tjerë duke e rritur konsumin”.

“260 milionë tenderë sekretë që thirren brenda ditës dhe vendosin njerëzit e kësaj qeverie dhe vetë qeveria është zullum i madh për buxhetin e shtetit”, tha ai të martën në Klan Kosova.