Qeveria e Sllovenisë e ka mbështetur të enjten një mocion për njohjen e shtetit palestinez dhe i ka kërkuar Parlamentit ta bëjë të njëjtën gjë.

Kryeministri i Sllovenisë, Robert Golob, ka thënë se qeveria e tij ia ka dërguar Parlamentit propozimin për njohjen e Palestinës.

Parlamenti slloven mund të mblidhet javën e ardhshme dhe ta hedhë në votim propozimin e Qeverisë.

Nevojitet pajtimi i Parlamentit që vendimi i qeverisë të jetë i efektshëm. Partia liberale në pushtet e Golobit e ka shumicën në Parlamentin me 90 ulëse dhe votimi rreth njohjes së Palestinës pritet të jetë formalitet.

Vendimi i qeverisë sllovene vjen vetëm dy ditë pasi Spanja, Norvegjia dhe Irlanda e njohën shtetin palestinez. Qëndrimet e tyre janë dënuar ashpër nga Izraeli.

Sllovenia do të bëhej vendi i 10-të i Bashkimit Evropian që e njeh zyrtarisht Palestinën. Norvegjia nuk është pjesë e bllokut 27-anëtarësh, por ajo zakonisht i përshtat politikat e jashtme me ato të bllokut.

Sllovenia e ka nisur procesin e njohjes së Palestinës në fillim të majit, por ka thënë se do të priste derisa të përmirësohej gjendja në luftën në Gazë mes Izraelit dhe Hamasit – grupit të shpallur terrorist nga ShBA-ja dhe BE-ja.

Golob ka thënë këtë javë se po e përshpejton procesin pas sulmeve të fundit të Izraelit në Rafah, si pasojë e të cilave më shumë se 1 milion palestinez kanë ikur atje.

Më shumë se 140 shtete e njohin shtetin palestinez, më shumë se dy e treta e Kombeve të Bashkuara.

Vendimi për njohjen e Palestinës ka nxitur fërkime në marrëdhëniet e BE-së me Izraelin. Spanja dhe Irlanda po bëjnë trysni që BE-ja të ndërmarrë masa kundër Izraelit, për shkak të sulmeve të tij të vazhdueshme në jug të Gazës.

Palestinezët duke e shikuar rrënimin e shkaktuar nga një sulm izraelit në një vend ku po qëndronin njerëz të zhvendosur në Rafah, Rripin e Gazës, 27 maj.

Izraeli e ka nisur luftën në Gazë si përgjigje ndaj një sulmi të Hamasit në jug të Izraelit më 7 tetor, ku u vranë 1 200 njerëz, kryesisht civilë, dhe u rrëmbyen rreth 250 të tjerë.

Lufta izraelite i ka vrarë më shumë se 36.000 palestinezë, gjysma e të cilëve fëmijë dhe gra, sipas zyrtarëve shëndetësorë palestinezë.

Por, lufta izraelite ka shkaktuar edhe krizë humanitare në Gazë, duke bërë që rreth 80 për qind e popullsisë të zhvendoset dhe qindra mijëra njerëz të vuajnë nga uria, sipas zyrtarëve të OKB-së. /REL