Qendra Kosovare për Studime të Sigurisë (QKSS) ka publikuar raportin “Perceptimet publike për besimin, korrupsionin dhe integritetin e institucioneve publike në Kosovë” për vitin 2022.

Forca e Sigurisë së Kosovës është renditur si institucioni më i besueshëm jo vetëm në sektorin e sigurisë, por edhe në krahasim me institucionet në kuadër të sektorëve të tjerë.

83 për qind e të anketuarve kanë shprehur besim apo besim të plotë në FSK-në.

Institucioni tjetër që gëzon nivel të lartë besimi është Agjencia e Menaxhimit të Emergjencave me 73 për qind të të anketuarve që kanë shprehur besim ose besim të plotë.

Policia e Kosovës është renditur në vendin e tretë në mesin e institucioneve të perceptuara më pozitivisht nga të anketuarit, me 72 për qind që kanë shprehur besim apo besim të plotë në  këtë institucion. Presidenca e Kosovës në këtë raport del se është institucioni i nivelit qendror me besueshmërinë më lartë prej 59 për qind të të anketuarve që kanë shprehur besim ose besim të plotë.  Ndërsa Qeveria e Kosovës në këtë raport ka marrë vetëm 34 për qind të besimit të të anketuarve, teksa 46 për qind e tyre kanë deklaruar se kanë pak besim ose nuk kanë besim fare.