Quni e Konjufca koordinohen për bashkëpunimin ndërmjet dy ministrive

15 maj 2020 | 16:43

Ministri i Mbrojtjes në detyrë, Anton Quni, ka pritur sot ministrin e Punëve të Jashtme në detyrë Glauk Konjufcën, i cili shoqërohej nga këshilltari politik Sabri Kiçmari.

Në pritje ishin të pranishëm zëvendësministri në detyrë Enver Dugolli, komandanti i FSK-së gjenerallejtënant Rrahman Rama, sekretari përgjithshëm u.d. Faruk Geci si dhe zyrtarë dhe oficerë të lartë të ministrisë.

Në fillim ministri Quni e njoftoi ministrin Konjufca për aktivitet në ministri dhe FSK, për angazhimet që ka dhanë FSK-ja në përballimin e gjendjes me pandeminë Covid-19, me detyrat dhe aktivitetet që kanë qenë të planifikuara.

Ai foli edhe për bashkëpunimin e gjerë që ka Ministria e Mbrojtjes me partnerët ndërkombëtarë, me NATO-n, duke theksuar bashkëpunimin e mirë ditor me Ekipin Këshillues Ndërlidhës të NATO-s (NALT).

Më pastaj dy ministrat biseduan për mundësitë e koordinimit ndërministror për bashkëpunim me jashtë, në raport me NATO-n dhe organizatat tjera ndërkombëtare të sigurisë dhe mbrojtjes.

Për dërgimin e FSK-së në misione paqeruajtëse jashtë vendit; për statusin kohor të mandatit të atasheve të mbrojtjes jashtë vendit; koordinimin e aktiviteteve për anëtarësim në A-5 (Karta e Adriatikut-SHBA) dhe pika të tjera.

Ministri Konjufca ka përgëzuar FSK-në për sukseset e deritashme, duke falënderuar dhe shprehur mirënjohje të veçantë për kontributin e FSK-së gjatë pandemisë në kthimin e qytetarëve kosovarë dhe transportin e tyre nga aeroporti ‘Adem Jashari’ në karantinë nga transporti i specializuar i FSK-së.

Ai shprehu gatishmërinë që bashkëpunimi në mes të dy ministrive të thellohet në fushat e përbashkëta, duke theksuar se do të bëjmë krejt çka duhet nga MPJ që FSK të ketë bashkëpunim ndërkombëtar më të zgjeruar dhe angazhime në kuadër të misioneve paqeruajtëse në botë, me qellim të inkuadrimit në NATO që është synim i shtetit të Kosovës.

(M.Q / Epoka e re)

Lajme të sponsorizuara

Të fundit
Drejtoria e Inspeksionit në Gjilan po vazhdon me lirimin e…