Dhjetëra qytetarë kanë zhvilluar një aksion para Zyrës së Rregulltarit të Energjisë (ZRRE) duke vënë thëngjill dhe pankarta me mbishkrimin “Asnjë cent më shumë”, aksion ky i organizuar kundër shtrenjtimit të rrymës.

Arbër Rushiti ka thënë se përmes këtij aksioni simbolik duan t’i kujtojnë ZRRE-së, Qeverisë dhe Kuvendit se ne flemë mbi qymyr. “Përfitimi i energjisë elektrike me qymyr është nga format më të lira të përfitimit të energjisë, por koston e ulët financiare e paguajmë shtrenjtë me shëndet”, ka thënë Rushiti, raporton KP.

Ai ka deklaruar se qytetarët janë viktima të ndotjes që shkaktojnë termocentralet andaj, sipas tij, kjo është edhe arsyeja pse qytetarët do të duhej të paguanin më pak. “Por, qeveria jonë po planifikon që përveç kostove shëndetësore që do të na kushtojë shtrenjtë, ta bëjë të shtrenjtë edhe rrymën nëpër shtëpitë tona”, ka shtuar Rashiti.