Sfida e parë çerekfinale e Superkupës do të zhvillohet sot (e mërkurë) në Gjakovë ndërmjet Rahovecit dhe Trepçës. “Vreshtarët” edicionin e kaluar ishin ndër skuadrat më të dalluara në elitë dhe shpresojnë se do të kenë një edicion sa më pozitiv.

Një nga basketbollistët më të talentuar të Rahovecit është Visar Ejupi. Ai flet për rrjedhën e përgatitjeve dhe ndeshjet në Superkupë. “Përgatitjet kanë shkuar shumë mirë dhe po përgatitemi për ndeshjen çerekfinale kundër Trepçës. Po shpresojmë për një paraqitje sa më të mirë. E kemi pasur edhe një ndeshje miqësore me Ponten, ku besojmë se jemi të gatshëm për Superkupë dhe edicionin e ri”, është shprehur Ejupi për faqen zyrtare të FBK-së.

Trepça në edicionin e kaluar u rendit e shtata, ku në “play-out” mundi dy herë AS Prishtinën dhe siguroi mbijetesën në elitë edhe për një edicion. Basketbollisti i Trepçës, Valdrin Haxhiu, është shprehur se përgatitjet i kanë filluar që tri javë dhe shpresojnë në rezultate pozitive.

“Ne përgatitjet i kemi filluar që në dritën e parë që kanë dhënë dritën e gjelbër organet përkatëse. Sigurisht se tri javë nuk janë të mjaftueshme, mirëpo do të përpiqemi ta marrim maksimumin e mundshëm për këtë kohë. Tash na pret ndeshja e Superkupës kundër Rahovecit dhe fillimi i kampionatit. Besoj se jemi të përgatitur për t’u bërë ballë sfidave. Njëkohësisht besoj shumë edhe në ngritje të paraqitjeve në vazhdim”, deklaroi Haxhiu për faqen zyrtare të FBK-së. Fituesi i duelit Rahoveci – Trepça në gjysmëfinale do të ndeshet me fituesin e përballjes Sigal Prishtina-Vëllaznimi.

Orari

Të mërkurën takohen në Gjakovë:
17:00 Rahoveci – Trepça
19:30 Sigal Prishtina – Vëllaznimi

Të enjten takohen në Prizren:
17:00 Golden Eagle Ylli – Ponte Prizreni
19:30 Peja – Bashkimi

(Epoka e re)