Mbi 35 persona kanë humbur jetën dhe dhjetëra të tjerë kanë mbetur të plagosur si pasojë e bombardimeve në një stacion treni në lindje të Ukrainës. Kievi akuzoi forcat ruse për sulmin, ndërsa Moska, e cila e mohon, thotë se raketa të tilla ka vetëm ushtria ukrainase.

Të paktën 35 persona kanë mbetur të vrarë në një stacion treni në lindje të Ukrainës si pasojë e një sulmi me raketë.

Kompania shtetërore hekurudhore thotë se më shumë se 100 persona kanë mbetur të plagosur në stacionin e trenit në Kramatorsk.

Guvernatori i Donetsk tha se mijëra njerëz ishin atje në kohë kur ndodhi sulmi, në përpjekje për t’u larguar nga zona.

Siç jemi mësuar të dëgjojmë kohët e fundit, Moska e Kievi lëshojnë deklarata që bien në kontradiktë me njëra-tjetrën.

Ukraina akuzoi menjëherë Rusinë për sulmin në stacionin e trenit, e cila solli edhe reagimin e shefit të diplomacisë së Bashkimit Evropian, Joseph Borrell i cili ndodhej në Kiev.

Borrell tha se e dënonte sulmin e Rusisë ndaj popullsisë civile të cilën e quajti një përpjekje për të mbyllur rrugën për evakuim.

Moska, njësoj siç bëri për vrasjen e civilëve në Buça ka mohuar përsëri sulmin në stacionin hekurudhor.

Ministria ruse e Mbrojtjes përmes një reagimi bën fajtore Ukrainë, duke shtuar se llojin e raketave të përdorua të premten e përdor vetëm ushtria ukrainase.

Ministria ruse e Mbrojtjes: Të gjitha deklaratat e regjimit të Kievit në lidhje me sulmin me raketë e cila pretendohet se është shkaktuar nga ne është një provokim dhe absolutisht i pavërtetë. Forcat e armatosura ruse nuk kishin asnjë mision me zjarr në 8 prill në qytetin e Kramatorsk. Raketat taktike Tochka-U, fragmentet e të cilave u gjetën pranë stacionit hekurudhor të Kramatorsk përdoren vetëm nga forcat e armatosura ukrainase.

Ajo që na mbetet të besojmë nga sulmet makabre janë vetëm trupat e pajetë të njerëzve të pafajshëm të cilën përbalten nga propaganda mediatike.