Përfaqësuesit e Listës Serbe të hënën kanë mbajtur një konferencë për media, ku kryetari i kësaj partie, Goran Rakiq, ka deklaruar se presidenti serb, Aleksandër Vuçiq, e ka mbështetjen e serbëve të Kosovës për gjetur një zgjidhje kompromisi mes palëve.

Rakiqi ka përsëritur deklaratën e djeshme të Vuçiqit duke kërkuar që “KFOR-i t’i mbrojë serbët në Kosovë”.

Në konferencën e djeshme, Vuçiq ka deklaruar se ka marrë mbështetjen e përfaqësuesve të serbëve nga Kosova për një zgjidhje kompromisi për çështjen e targave dhe dokumenteve.

Pas takimit me përfaqësuesit serbë nga Kosova, Vuçiqi në një adresim drejtuar kombit tha se nuk e di se cila do të mund të jetë zgjidhja e kompromisit për çështjen e targave dhe dokumenteve serbe.

Kujtojmë se këto çështje së fundmi shkaktuan tensione në veri të Kosovës, me ç’rast Qeveria e Kosovës pas kërkesës së ShBA-së, pezulloi vendimin për reciprocitet në targa dhe dokumente.