Kryeministri i Shqipërisë, Edi Rama i është kundërvënë presidentit llir Meta ditën e sotme me anë të një postimi në llogarinë e vet në “Twitter”.

Ai e akuzon Metën për nxitjen e protestave në vend, duke theksuar se ka bashkëpunuar me ish-kryeministrin Sali Berisha.

“Kur policia reagoi ndaj një provokatori famoz gjatë ushtrimit të dhunës opozitare tek Kuvendi, Ilir Meta vrapoi në spital për të vizituar heroin e dhunës! Kur policit të shtetit, i nxjerrin syrin dhunuesit me kapuçë të nxitur prej tij e Saliut, Ilir Meta dënon dhunën policore! Sipas Ilir Metës policia nuk duhet të reagojë, po duhet të dorëzojë Tiranën dhe veten në duart e dhunuesve të verbër, që ai bashkë me Saliun të bëjnë Lulin dhëndërr të pushtetit dhe Monikën arkëtare të shtetit, si në kohët e arta të bashkëqeverisjes me plumba mbi protestuesit! Por Iliri dhe Saliu duhet ta harrojnë se e kthejnë prapë Shqipërinë për përsheshin e tyre dhe sado ëndrra të shohë Luli duke mbajtur lugën në dorë që t’i vijë gjella e Monikës, Shqipëria do të vazhdojë drejt përpara, me mund e durim, për t’u bërë ajo që duan fëmijët e saj!”, ka shkruar Rama.

Por Iliri dhe Saliu duhet ta harrojnë se e kthejnë prapë Shqipërinë për përsheshin e tyre dhe sado ëndrra të shohë Luli duke mbajtur lugën në dorë që t'i vijë gjella e Monikës, Shqipëria do të vazhdojë drejt përpara, me mund e durim, për t'u bërë ajo që duan fëmijët e saj!

— Edi Rama (@ediramaal) December 12, 2020