Kryetari i Prishtinës, Përparim Rama, ka pritur në takim drejtorin e Policisë së Kosovës për rajonin e Prishtinës, Basri Shabani për të diskutuar rreth situatës së përgjithshme të sigurisë në kryeqytet.

“Pas një numri të incidenteve të kohëve të fundit në Kryeqytet, shqyrtuam masat potenciale për adresim të situatës. U dakorduam të rrisim bashkëpunimin me Prokurorinë e Shtetit dhe gjykatat kompetente për reagimin më të shpejtë për këto raste, marrjen e masave parandaluese si dhe fuqizimin e politikave ndëshkuese ndaj shkaktuesve të veprave penale në Kryeqytet”, ka shkruar Rama në “Facebook”.

Më tutje, ai i ka përcjell drejtorit Shabani rëndësinë e lëvizjes së lirë të këmbësorëve dhe ka kërkuar fokus më të madh të policisë në lirimin e trotuareve nga veturat e parkuara ilegalisht dhe parkingjet ilegale ne përgjithësi.

“U dakorduam që në mënyrë urgjente të gjejmë zgjidhje për të angazhuar kompani për largimin e veturave të parkuara ilegalisht. Shkëmbyem informata edhe rreth zbatimit të projektit digjitalizues të Qytetit të Mençur (Smart City) dhe lidhshmërinë e këtij projekti me punët operative të Policisë. Drejtori Shabani kërkoi nga institucionet e Kryeqytetit që të rritet numri i inspektorëve komunal mbas orës 22:00 në mënyrë që të rritet efikasiteti i reagimit të institucioneve të sigurisë dhe të Kryeqytetit”, ka bërë me dije Rama.

Po ashtu, drejtori Shabani e informoi kryetarin Rama se pavarësisht disa incidenteve të sigurisë, ka trende pozitive në rënien e numrit të veprave penale, aksidenteve të trafikut, në veçanti atyre me fatalitet, si dhe në rritjen e numrit të rasteve të zbuluara.

“Kryeqyteti do të vazhdojë të bashkëpunojë me Policinë e Kosovës drejt ofrimit të një ambienti të sigurt për të gjithë qytetarët”, ka shkruar Rama në “Facebook”.