Prej orës 13:00 të ditës së sotme, e shtunë, deri të hënën në orën 05.00 të mëngjesit, Shqipëria futet në izolim. Asnjë këmbë njeriu në rrugë dhe asnjë biznes me qepena ngritur, përveç policisë dhe ushtrisë, e personelit mjekësor dhe atyre që i janë bashkuar procesit humanitar për t’i ndihmuar familjet në nevojë.

Ashtu si edhe në fundjavën e kaluar, vendi ndodhet nën masa të ashpra sa i takon betejës për frenimin sa të jetë e mundur të përhapjes së virusit vdekjeprurës, COVID 19. Deri më tani ky virus u ka marrë jetën 9 personave në Shqipëri.

Por java tjetër nis me ndryshim dhe forcim masash.

Kryeministri Edi Rama njoftoi dje se nga e hëna askush nuk do të mund të dalë më për pazar pa marrë leje. E kjo do të jepet për vetëm një person të familjes.

Procedura për leje nga drejtoresha e AKSh-it:

Në portalin e-albania, ky autorizim do të jetë i pari dhe quhet thjesht ‘leje për dalje’. Më pas shfaqet shërbimi, kliko përdor dhe ne kemi bërë të mundur përzgjedhjen e ditës se kur e duam lejen e daljes.

Po zgjedh 30 marsin. Klikojmë vazhdo dhe më mundësohet certifikata ime familjare ku vetëm një prej pjesëtarëve të familjes mund të aplikojë për leje që do të ketë orën dhe kohëzgjatjen vetëm një orë.

Zgjedh një orar nga ora pesë deri në një, përcaktoj ose jo numrin tim të telefonit. Më pas leja do të shkojë me email në acoountin e portalit e-albania më pas do të vijë një sms nëse keni lënë edhe numrin e telefonit.

Duke zgjedhur dërgo kam mundësi të finalizoj autorizimin dhe më pas të vjen një sms.