Kryeqyteti italian “vishet” verdhekuq, me Romën që triumfoi në derbi duke i dhënë pak frymëmarrje një sezoni që po shkon keq.

Kjo ishte një nga netët e pakta që tifozët e Romës kishin një arsye për të festuar, teksa suksesi 2-0 kundër Lazios solli gëzim, solli shpresë për të ardhmen.

Claudio Ranieri bëhet trajneri i parë në Serie A që fiton të gjithë derbet e kryeqytetit, 5 në 5, por tekniku italian u përpoq ta zbuste këtë detaj duke i dhënë më shumë vlera fitores së ekipit, por nuk harroi edhe një herë t’i shfaqte besnikëri Romës.

“Unë jam i disponueshëm të qëndroj këtu deri në fund të vitit, më pas vetëm Zoti e di. Në derbi lojtarët karikohen vetë, nuk duhet trajneri. Kualiteti i këtyre lojtarëve është shumë i lartë”, u shpreh Ranieri.