Misioni paqeruajtës i NATO’s në Kosovë, ka reaguar pas raportimit të  mediumit gjerman Bild, për përgatitjen e Italisë për skenarin e largimit të trupave amerikanë nga Kosova.

KFOR, ka thënë se zyrtarët amerikanë e kanë bërë të qartë angazhimin e tyre ndaj Aleancës Veriatlantike.

Ata në një përgjigje për Insajderin kanë thënë se po ashtu, SHBA ka bërë të qartë pritshmëritë e tyre, që aleatët e NATO’s të bëjnë më shumë, të investojnë më shumë dhe të prodhojnë më shumë në mbështetje të sigurisë.

“Zyrtarët amerikanë e kanë bërë të qartë angazhimin e tyre ndaj Aleancës (Veriatlantike), përfshirë praninë e SHBA-së në Evropë dhe se parandalimi dhe mbrojtja e NATO-s duhet të mbeten të fuqishme. Si pjesë e kësaj, SHBA e ka bërë të qartë gjithashtu pritjet e saj që aleatët e NATO-s të bëjnë më shumë, të investojnë më shumë dhe të prodhojnë më shumë në mbështetje të sigurisë sonë të përbashkët. NATO po përshtatet vazhdimisht me një mjedis në ndryshim. Kjo është pjesë e asaj që duhet për të qëndruar gati”, thuhet në përgjigjen e tyre.

“Angazhimi ynë për stabilitet në të gjithë Ballkanin Perëndimor është i palëkundur. KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt dhe të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme, dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë, në rolet e tyre përkatëse si reagues të sigurisë. Shtetet e Bashkuara vazhdojnë të luajnë një rol themelor brenda KFOR-it, përmes kontributit të saj të gjatë, i cili aktualisht arrin në mbi 600 trupa”, thonë tutje nga KFOR.

Mediumi gjerman “Bild”, ka raportuar sot se ekziston një shqetësim i madh në shumë pjesë të Evropës për negociatat SHBA-Rusi dhe mundësinë e tërheqjes së trupave amerikane nga disa pjesë të Evropës, mes tyre përmendet edhe Kosova.

Sipas këtij raportimi Italia, e cila ka më së shumti trupa në Kosovë, është duke u përgatitur për tërheqjen e mundshme të trupave amerikane nga Kosova, që renditen pas Italisë me numrin më të madh të trupave në Kosovë, në kuadër të KFOR-it.

“Sipas informacioneve të BILD, Italia po përgatitet për një tërheqje të mundshme të trupave amerikane nga Kosova. Atëherë aleatët evropianë do të ishin të vetëm në Ballkan kundër mikut të Putinit, Aleksandar Vuçiq dhe ushtrisë së tij të fuqishme serbe”, thuhet në artikullin e Bild, të publikuar sot.