Një pacientes, me iniciale H.B, e moshës 39-vjeçare, i është shpëtuar jeta nga kardiokirurgët në QKUK, e cila, pas lindjes, kishte pësuar çarje-diseksion akut të aortës me prezencë të flapit intimal, duke filluar nga valvula aortale, me përfshirje edhe të aortës abdominale, duke shkaktuar edhe diseksion të arteries së djathtë të zemrës, respektivisht infarkt akut të murit të poshtëm të zemrës, pamjaftueshmëri të valvulës aortale.

QKUK-ja ka bërë me dije se ndryshimet tjera ishin vërtetuar edhe me CT.

“Pacientja ishte transferuar nga Emergjenca e Ferizajt në emergjencë QKUK, me dhimbje të forta në gjoks dhe me shenja në EKG të infarktit akut, të murit të poshtëm të zemrës dhe me nivel të lartë të troponinës. Pacientja ka deklaruar se ka pasur lindje normale katër ditë më parë (dhe kjo ishte lindja e saj e tretë me radhë). Gjatë këtij intervenimi kirurgjik është bërë Bentall procedurë (ndërrimi valvulës aortale, rrënjës së aortës dhe zëvendësim të aortës ascendente megraft) dhe bypass-urëzim i arteries së djathtë të zemrës përmes venës në graftin aortal)”, është thënë në njoftimin e QKUK-së.

Operacioni ka kaluar pa komplikime dhe me menaxhimin e duhur të stafit në mjekimin intenziv kardiokirurgjik dhe repartin e kardiokirurgjisë, pacientja është lëshuar në shtëpi me gjendje të mirë të përgjithshme dhe lokale, në ndjekjen e këshillave të udhëzuara nga klinika në përdorim të terapisë së rregullt.

Disekacioni i aortës haset në tri raste, në 100 000 banorë, është më i shpeshtë tek meshkujt, se sa te femrat. Faktorë të rreziku janë hipertensioni, duhan pirja, displipidemit dhe sëmundjet e lindura të indit lidhor. Zakonisht, në shumicën e rasteve paraqitet pas moshës 60-vjeçare, ndërsa në 10 për qind të rasteve para moshës 40-vjeçare.

Tek femrat e moshës nën 40-vjeçare disekacioni akut i aortës haset në 50 për qind të rasteve gjatë shtatzënisë apo pas lindjes.

Stafi i Klinikës së Kardiokirurgjisë me Kardiologji Invazive ju ka bërë me dije të gjithë qytetarëve të Republikës së Kosovës që, për çdo nevojë sa i përket sëmundjeve të zemrës, të drejtohen në QKUK, pa pasur nevojë të kërkojnë ndihmë në qendrat tjera jashtë.

/Epoka e re/