Ish-pjesëtari i Ushtrisë Çlirimtare të Kosovës, Qerim Kelmendi, javë më parë u gjet nga policia i djegur në veturën e tij në fshatin Llabjan të Komunës së Pejës.

Rrethanat se si ka ndodhur rasti ende nuk janë të qarta për organet e rendit. Rasti fillimisht është hetuar në Prokurorinë Themelore të Pejës, megjithatë, më vonë kompetencat i kanë kaluar Prokurorisë Speciale, kjo me qëllimin që të kryhen hetime më efikase.

Këtë e ka konfirmuar zëdhënësi i prokurorisë, Shkodran Nikçi.

“Ju njoftojmë se ky rast gjatë ditës se sotme ka kaluar në kompetencë të Prokurorisë Speciale të Republikës së Kosovës”, ka deklaruar ai për “T7”.

Për kalimin e lëndës në prokurorinë speciale nuk kanë pasur informacione familjarët e të ndjerit. Megjithatë, vëllai i Qerim Kelmendit, Osman Kelmendi i ka thënë “T7” se është mirë që Specialja po e trajton këtë rast.

“Po dëgjoj nga ju për këtë lajm, por është mirë që Specialja e ka marrë këtë rast, kjo tregon seriozitet. Ne i besojmë shtetit të Kosovës, por ende nuk jemi intervistuar nga Prokurorit”, ka deklaruar ai.

Qerim Kelmendi ishte një prej ushtarëve të parë të UÇK-së, mik i heroit Ilir Konushevci dhe vëllai i Ibrahim Kelmendit, njërit nga drejtuesit e Lëvizjes Popullore të Kosovës.

Për vrasjen e tij kanë reaguar presidenti i shtetit, Hashim Thaçi, kryeministri Albin Kurti, ish-kryeministri Ramush Haradinaj dhe bashkëluftëtarë të tij.