Lideri i Lidhjes Demokratike të Kosovës (LDK), Isa Mustafa, e ka quajtur të suksesshme dhe demokratik procesin zgjedhor brenda kësaj partie.

Ai ka thënë se ka një interesim të gjerë për anëtarësime të reja në LDK.

“Zgjedhjet e brendshme në LDK synojnë forcimin e mëtejmë të kësaj Lidhjeje, që gëzon besimin më të madh në Kosovë. Po informohem çdo ditë se kemi një proces të suksesshme dhe demokratik dhe një interesim të gjerë për anëtarësime të reja në LDK. Fokusimi ynë është në zgjerimin e LDK-së, në zgjedhje të suksesshme në nëndegë dhe në degë”, ka shkruar Mustafa në llogarinë e vet në “Facebook”.

Megjithatë, ai ka thënë se kandidimet për kryetarë të degëve dhe për kryetar të LDK-së do të bëhen në kuvendet e degëve përkatësisht në atë qendror.

Sipas Mustafës, tani LDK-ja nuk ka kandidat për kryetar e as kryetar në largim.

“Kandidimet për kryetarë të degëve dhe për kryetar të LDK-së sipas statutit, do të bëhen në kuvendet e degëve, përkatësisht atë qendror të LDK-së. Tani LDK-ja nuk ka kandidat për kryetar e as kryetar në largim. Zgjedhjet i fillon dhe i kryen LDK-ja duke e respektuar vullnetin e shumicës. Ky vullnet do të dihet pasi të përmbyllet procesi në degë. Prandaj kandidatët i shpall LDK-ja duke respektuar vullnetin e çdonjërit. Do t’ju isha mirënjohës gjithë atyre që e respektojnë këtë proces”, ka deklaruar Mustafa.

/Epoka e re/