Ish-ministrja e Ekonomisë, Hykmete Bajrami ka reaguar pasi i akuzuari për vjedhjen e 2.1 milionë eurove të thesarit, Labinot Gruda e pranoi fajësinë.

Bajrami ka thënë se gjithmonë do të denoncojë çdo krim dhe vjedhje që ndodh. Kjo pasi sipas saj, ka qenë vet ajo që e ka denoncuar Grudën për vjedhjen e 2.1 milionë eurove të thesarit.

“Sot është ditë e madhe për drejtësinë. Është ditë e madhe për Kosovën. Menjëherë duhet të nisë kthimi i parave në buxhetin e Kosovës. Drejtësia duhet ta kryejë detyrën deri në fund pasi i akuzuari ka pranuar fajin dhe ka hapur rrugën për sqarimin e 2.1 milionë eurove deri në fund.”, ka shkruar Bajrami.

Reagimi i plotë i saj:

E denoncova, dikush e pa si faj, e pranoj këtë faj

Kam pranuar me qindra mesazhe përkrahëse që kam DENONCUAR vjedhjen e 2.1 milionë eurove. Dhjetëra e qindra reagime nëpër rrjete sociale e kërcënime pse kam denoncuar.
Sot, kur i akuzuari kryesor e PRANOI fajin, po e pranoj edhe unë një faj. Fajin se e kam DENONCUAR.
Dje, sot, nesër dhe përgjithmonë do të bëj të njëjtin faj. Prapë, do të DENONCOJ secilin krim e secilën vjedhje që ndodh. Nuk jam dorëzuar dhe nuk dorëzohem as nga ata që kanë tentuar të më ndalin të flasë e denoncoj paligjshmëri e shkelje ligjore tjera. Prandaj, sot, është ditë e madhe për drejtësinë. Është ditë e madhe për Kosovën. Menjëherë duhet të nisë kthimi i parave në buxhetin e Kosovës. Drejtësia duhet ta kryejë detyrën deri në fund pasi i akuzuari ka pranuar fajin dhe ka hapur rrugën për sqarimin e 2.1 milionë eurove deri në fund.