Klubi spanjoll, Real Madridi thuhet se nuk po heq dorë nga ideja për emërimin e Xabi Alonsos si pasues i Carlo Ancelottit.

Sipas gazetës spanjolle El Gol Digital, Real Madridi është seriozisht i interesuar për trajnerin e Bayer Leverkusenit, Xabi Alonso.

Burimi raporton se emërimi i trajnerit bask si menaxher i klubit mbretëror është një obsesion për presidentin Florentino Perez.

Për ta bërë këtë, ai është i gatshëm të plotësojë kushtin e Alonsos, që përfshin nënshkrimin e mesfushorit gjerman me tipare sulmuese, Florian Wirtz.

Megjithatë, gazetarët theksojnë se, me gjasë, viktima e këtij transferimi do të jetë ylli brazilian Vinicius Junior, i cili do të duhej të shitet për t’i lënë vend yllit gjerman.

Në sezonin 2024/25, Vinicius Junior luajti 41 ndeshje në nivel klubi, duke shënuar 18 gola dhe duke dhënë 13 asistime.

Faqja e specializuar e statistikave dhe transferimeve, Transfermarkt e vlerëson lojtarin në 200 milionë euro, ndërsa klubet më të interesuara janë ato nga Arabia Saudite.