Ministri i Punës dhe Mirëqenies Sociale (MPMS), Skender Reçica, ka pritur të hënën në takim përfaqësues të Fondit Monetar Ndërkombëtar (FMN), të kryesuar nga Stephanie Eble, me të cilët ka diskutuar rreth reformave të ndërmarra nga MPMS-ja në fusha si ajo pensionale, sociale dhe fusha e punësimit.

Ministri i ka njoftuar përfaqësuesit e FMN-së për reformën pensionale të ndërmarrë nga MPMS-ja, ku tha se fokusi do të jetë te reforma në aspektin ligjor, duke marrë parasysh pabarazinë në ligjet aktuale.

“Qëllimi është që të kemi një sistem pensional që do ti bëjë ballë kohës. Deri në fund të vitit do ta kemi koncept dokumentin për reformat pensionale”, ka thënë ministri Reçica.

Ai i ka njoftuar të pranishmit edhe rreth reformës së skemave sociale, me ç’rast ka treguar se MPMS-ja po punon në krijimin e një ligji gjithëpërfshirës për persona me aftësi të kufizuara, krahas përpjekjeve tjera konkrete.

Temë diskutimi në mes të ministrit dhe përfaqësuesve të FMN-së ishin edhe politikat e MPMS-së për tregun e punës dhe rritjen e punësimit.

“Ne kemi miratuar në Qeveri Strategjinë Sektoriale të MPMS-së dhe Planin e Veprimit për Punësimin e të Rinjve. Janë këto dy dokumente strategjike të cilat tashmë kemi filluar ti jetësojmë në praktikë”, ka thënë ministri Reçica.

Ai ka falënderuar FMN-në për përkrahjen ndërkaq nga përfaqësuesit e këtij Fondi mori mbështetje për reformat e ndërmarra nga MPMS në fushat e lartcekura.

/Epoka e re/