Izraeli po përgatitet këtë të shtunë për të nisur një sulm tokësor në Rripin e Gazës të kontrolluar nga Hamasi, pasi u tha palestinezëve që jetonin në territorin e dendur të populluar të largohen në jug drejt një kufiri të mbyllur me Egjiptin, raporton Reuters.

Këshilltari izraelit për sigurinë kombëtare ndërkohë paralajmëroi grupin militant libanez Hezbollah që të mos fillonte një luftë në një front të dytë në veri të Izraelit, duke kërcënuar me “shkatërrimin e Libanit” nëse do të ndodhte.

Izraeli është zotuar të asgjësojë grupin militant Hamas që kontrollon Gazën në shenjë hakmarrjeje për sulmin nga luftëtarët e tij, të cilët sulmuan qytetet izraelite një javë më parë, duke vrarë civilë dhe duke marrë shumë pengje.

Rreth 1,300 njerëz u vranë në një sulm brutal që e la Izraelin në tronditje të thellë, si në shkallën e vrasjes, ashtu edhe nga pamjet tmerruese të telefonave celularë dhe raportet nga shërbimet mjekësore dhe të urgjencës për mizoritë në qytetet dhe kibutët që u sulmuan.