Dashurie Cahanaj gatuan në një shkollë profesionale në Prizren, Kosovë, duke studiuar për një kualifikim që ajo shpreson se do t’ia japë një biletë për t’u larguar më shpejt nga vendi sesa diploma e saj e infermierisë, e fituar me vështirësi.

23-vjeçarja, si një numër në rritje i bashkëmoshatarëve të saj, është e dëshpëruar të largohet për ta gjetur një punë në pjesë më të pasura të Evropës, e joshur nga pagat më të mira dhe mundësitë më të gjera.

Ajo mund të fillojë t’i plotësojë dokumentet dhe formularët e vizave për t’i transferuar aftësitë e saj mjekësore. Por konkurrenca për një punë të tillë është e ashpër dhe koha ecën shpejt.

“Nga këtu do të duhen vite derisa ta marr një vizë pune për një punë si infermiere në Gjermani”, i tha ajo Reutersit. Në vend të kësaj, ajo tashmë ka kontaktuar me furrat e bukës në Slloveni, të cilët janë gati të marrin menjëherë staf me kualifikim më të ulët, transmeton Gazeta Express.

Pasi të jetë vendosur në Bashkimin Evropian, ajo do të jetë në një pozicion më të fortë. “Kam zbuluar se gjetja e një pune në një furrë buke në Slloveni dhe më pas aplikimi për të punuar si infermiere në Gjermani është shumë më e shpejtë për mua.”

Me bruto produktin vendor prej 4,300 dollarësh për kokë banori dhe një të tretën e popullsisë të papunë, Kosova renditet në vendet më të varfra të Evropës.

Rreth 78% e kosovarëve të moshës ndërmjet 18 dhe 35 vjeç thanë se do të largoheshin jashtë vendit nëse do t’u jepej një mundësi, në një sondazh të Institutit Republikan Ndërkombëtar në fund të nëntorit.

Gjithsej 203,330 qytetarë kosovarë u larguan nga vendi ndërmjet viteve 2008 dhe 2018 dhe aplikuan për azil në Bashkimin Evropian, sipas një studimi të publikuar nga Instituti i Politikave Evropiane të Kosovës – duke ngritur frikën për mungesën e fuqisë punëtore në vend në të ardhmën e afërt.

Qendra e Trajnimit Profesional në Prizren është një nga gjashtë shkollat profesionale në Kosovë që u ofron të rinjve kurse të shkurtra në çdo gjë, nga pjekja dhe grimi deri te saldimi dhe punimet elektrike.

Drejtori i përgjithshëm i qendrës, Sinan Gashi, tha se numri i studentëve është dyfishuar që nga viti 2015.

“Nuk ka të ardhme për të rinjtë (këtu)”, tha Rilind Babatinca, një ekonomist i trajnuar nga qyteti i Podujevës, në të njëzetat e tij.

Ai tha se tashmë ka filluar të bëjë plane për t’i lënë mënjanë kualifikimet e tij dhe për të aplikuar për vizë për të punuar në një restorant të ‘fast-food’-it në Gjermani.

Rilind Babatinca përgatit dokumentet për të aplikuar për vizë, Prishtinë, Kosovë, 19 nëntor 2021. REUTERS/Fatos Bytyçi