Aeroporti Ndërkombëtar i Tiranës (TIA) ka pritur këtë të mërkurë fluturimin e parë nga Tel Avivi, duke shënuar hapjen e një linje të re direkte ajrore mes Shqipërisë dhe Izraelit.

Kjo linjë do të operojë tre herë në javë, duke ofruar më shumë mundësi udhëtimi për turistët, udhëtarët e biznesit dhe komunitetet shqiptare dhe izraelite.

Ceremonia e mirëseardhjes është zhvilluar në prani të drejtorit ekzekutiv të Sandor, dhe ambasadores së Izraelit në Shqipëri, të cilët janë pritur nga përfaqësues të lartë të Aeroportit Ndërkombëtar të Tiranës dhe të Autoritetit të Aviacionit Civil Shqiptar.

Piervittorio Farabbi, drejtor operacional i TIA-s, ka thënë se “kjo linjë është një urë që lidh jo vetëm dy qytete, por dy popuj”.

“E dimë që Izraeli është një treg me shumë interes për turizmin dhe shpresojmë që ky të jetë vetëm fillimi i një bashkëpunimi të suksesshëm”, ka thënë ai.

Kurse Maksit Et’hemaj, drejtor i Aviacionit Civil Shqiptar, ka thënë se “një nga detyrat kryesore të aviacionit civil është të lidhë kontinentet, shtetet, kulturat dhe njerëzit”.

Ndërkohë Gal Gershon, Drejtor Ekzekutiv i Sandor El Al, ka thënë “se gjithnjë e më shumë izraelitë të kenë mundësinë të vizitojnë këtë vend të bukur dhe të mikpritshëm, dhe po ashtu të mirëpresim më shumë shqiptarë në Izrael për të përjetuar historinë dhe kulturën tonë”.