Rreziku vjen në shumë forma.

Për liderin për një kohë të gjatë të Turqisë, Recep Tayiip Erdogan, ajo vjen në formën e një ish-nëpunësi civil, i dhënë pas krijimit të emoji-ve të zemrës me duart e tij.

Kemal Kilicdaroglu, i mbështetur nga një aleancë opozitare prej gjashtë partish, thotë se nëse fiton ai do të sjellë lirinë dhe demokracinë në Turqi, me çdo kusht.

“Të rinjtë duan demokracinë”, tha ai për median shtetërore britanike BBC. “Ata nuk duan që policia të vijë në dyert e tyre herët në mëngjes vetëm sepse kanë postuar në Twitter”.

Ai është rivali kryesor i liderit turk në zgjedhjet e 14 majit dhe ka një epërsi të ngushtë në sondazhet e opinionit. Kjo garë e ngushtë pritet të shkojë në raundin e dytë dy javë më vonë.

Aktualisht turqit mund të shkojnë në burg për “fyerje të presidentit” dhe shumë madje e kanë pësuar.

“Unë po u them të rinjve se mund të më kritikojnë lirisht. Do të sigurohem që ata ta kenë këtë të drejtë,” thotë 74-vjeçari, i cili drejton Partinë Republikane Popullore (CHP) kryesore opozitare.

Disa nga mbështetësit e Kilicdaroglu kanë frikë për sigurinë e tij, por ai thotë se kjo vjen me pozitën.

“Të jesh në politikë në Turqi do të thotë të zgjedhësh një jetë me rreziqe. Unë do të eci në rrugën time çfarëdo që të bëjë Erdogan dhe aleatët e tij. Ata nuk mund të më largojnë. Ata nuk mund të më trembin. Unë i bëra një premtim këtij kombi”.

Presidenti Erdogan, 69 vjeç, është tallur me rivalin e tij në të kaluarën duke thënë se ai “nuk mund të grumbullonte as një dele”.

Por tani është më e vështirë të anashkalohet.

Duke mbërritur për një tubim në qytetin port të Izmirit, një bastion i opozitës, kandidati i pakicës përshëndetet nga një det mbështetësish që valëvitin flamurin.

Aty dëgjohen thirrjet “Kilicdaroglu është shpresa e popullit”.

Shumë në turmë janë të rinj. Pesë milionë turq do të votojnë për herë të parë në këto zgjedhje.