Ambasadori gjerman në Kosovë, Jorn Rohde, ka thënë se i vjen shumë mirë që sheh shumë solidaritet me Ukrainën në Kosovë.

Rohde, në seancën solemne në Kuvendin e Prishtinës, ka thënë se do të sigurohen që përpjekjet kriminale të presidentit rus, Vladimir Putin, të dështojnë, raporton “EO”.

“Shpresa më e madhe për mua është kjo shprehje e solidaritetit që po e shohim edhe pas një viti të luftës kundër Ukrainës. Ne qëndrojmë përkrah Ukrainës dhe qëndrojmë me Ukrainën dhe dje kur e pash rezolutën në Kombet e Bashkuara ku 141 shtete ishin bërë bashkë dhe vetëm 7 ishin kundër”.

“Mijëra ukrainas kanë gjetur strehim në shumë shtete, ndihmat ushtarake e shëndetësore tregojnë se të gjitha shtetet mbështesin Ukrainën ndërkohë që sigurohemi që Putin të dështojë në përpjekjet e tij kriminale për të nënshtruar një shtet tjetër”, ka thënë Rohde.